1Ti 2 | ASO | STEP | Ido' naza gamazi gaka do lolongu' mene gana' neve nene ti' lo nolo-gimuve: Lingine nene O'mosolavo' laa' ilo. Ido' lengita inite' ma vise' igi ma nemukisi nene O'mosola laa' ilo. Ido' evene' ato ato' muki' nene hize ele' o-ngedelive li O'mosola laa' ilo. Ne'mine ilizangu' nene isaa' neve li-di opo'ni laa' ilo.

1 Timothy 2

Paulo' Timoteo'ni Lo-dine' Gamazi

1 Ido' naza gamazi gaka do lolongu' mene gana' neve nene ti' lo nolo-gimuve: Lingine nene O'mosolavo' laa' ilo. Ido' lengita inite' ma vise' igi ma nemukisi nene O'mosola laa' ilo. Ido' evene' ato ato' muki' nene hize ele' o-ngedelive li O'mosola laa' ilo. Ne'mine ilizangu' nene isaa' neve li-di opo'ni laa' ilo. 2 Ee, laza monoku' minine' monovolo' e'mete osu' lo O'mososi evenekisi monovo lisihekovo' o-ngedo mino goboni mili-lidamavo hongu lo laminovo' mineloningumu' nene guve'inesi ve nabamukisi ido' gizebo i-lidaa' gono daa' ave mukikumukisi nene O'moso'mo hize ele' o-ngedelive lo ezela laa' olone. 3 Ne'mine oga' olone' nene do lu' izaa' ive O'moso'mo ningivo lamine' ogavo mulunou' lamine' oloseive. 4 Aza nene evene' muki' lukuvo nalizaho ido' mono' gamazi gihile nene go'zi vai' lilizaho losavo' gele minaa' neive. 5 Naza O'moso'mo evene' mukikumu' lukuvo nalizaho lo gala gele minaa' neingumu' O'mosola a'mine alevemu' laa' ilizave noluvoni' nene O'moso ne mo hamokovo' neivosa ido' O'mososi evenekisi goholuso' mino kuku holo-ledo do hamo' o-ledaa' ive nesi nene hamokovo' neivosa noluve. A'mine kuku holo-ledaa' ive nene evene' minive Izesu' Kilisito' 6 ado' evene' muki' kuluhize-ledelingumu' meni've ei' oko'no hulo hilive nemu' nene noluve. Ne'mine ine' nene O'moso'mo evene' muki' lukuvo nalizahoo lo gala gele minine' nene gamene'velo' lisihe' ogo lelebizavo mo ningo gele none. 7 A'mine gamazi nene lo soto soto' ilinive aposolo lolo' iline lo O'moso'mo nele'mize molani' ve. Naza ne'mine noluvoni' nene mo sozasi lamuvoni'za mo lamineto' gehepeve noluve. Aza nene evene' heta ato' ve gamazi gihile lamine' apize ngeme ngeme' oga' anive lolo' ogo nanivo ingine gili ele'vole' ilizave losa nele'mize molani' ve.

Mono' Mulise Milalizangu' Vemohokisi Venekisi E'metilizani' Monovomu' Timoteo'ni Lo-dine' Gamazi

8 Nemu' nene mono' mulise numudo' namado' mini'mi monangu' vemoho' ingine O'mosola nene laa' ilizave losa noluve. A'mine O'mosola lilisa a'ine di hozi lilizani' nene lihime'ine nomine' mini ngizebolo' nomivo engiku' lovo lolize ne'minesi nomivo minisa nene O'mosola lilisave. 9 Ido' a'mine'mine ogo venelite e'metilizani' monovomu' lo-gemelove: Vene' neve nene evenelite ma ningilizahe ningamilizahe li madu'ine zopovo nalava izi di ma'mine ma'mine igi oko'nido' nite' meni've dizo minine' inite' ngilisa gonolise inite' ato ato' meni've dizo minine' ngalulu' nehe ngolidunu' lili' ani' inite' nehe nevo'mine inite' ngilami ha evene' do upuho' o-ngedamiline' inite' laminekovo' ngilaa' ilizani' nene lamine' ve. 10 Ado' O'moso opo'ni laa' noune laa' ani' venelite igi mili ilizado' lisihe' o minine' monovo lamineto' e'meti igi mili minilizani' ne'mo neve nene engi' oko'nido' gonolise ne'mine nene mineleseive. 11 Vene' neve nene gelekele' gehepeve igi mini elese' iki mini gamazi nene di madu'ningu' milika' milika' igivo' minaa' ilizave. 12 Vene' neve nene vemoho' gamazi apize ngemaa' nehe vemoho' ngivile' o mino gizebo o-ngedaa' nehe ne'mine ilizangumu' nene gele ngemamo o'ove noluze. Vene' ingine elese' ikiivo' minilizave. 13 Nene Nanitekumu' ve. O'moso'mo gana' nene Eva'ni lolo' amo Adamu'ni nene gomu' lolo' ine' ve. 14 Ido' Satani'mo za gihilemu' golo izavo gele ladeni ive nene Adamu' nevoba asi Eva' gele ladeni ogosa Satani'mi gamazilo' gele do O'moso'mo line' gamazi avuto' ine' ve. Nemu' vene' neve nene vemoho' ngivile' ami elese' igivo' minilizave losa noluve. 15 Ne neiha vene' ingine Guvelesi vemu' gele mu'musi' i mini lu'ine ngemaa' monovolo' e'meti mini ido' lihime monovomu' olovo' i mini vene' lamine' gehepeve gili mini nizavo izipe gidaa' ilizangu' nene lukuvo ngemeleseive.